Melanomadan ejir çekýän hassa rus “Neoonkowak” sanjymy urlandan soň, synagyň netijelerinde ilkinji üýtgeşmeler hasaba alyndy. Bu barada Russiýanyň Saglygy goraýyş ministrliginiň N.F. Gamaleýa adyndaky Epidemiologiýa we mikrobiologiýa milli ylmy-barlag merkeziniň ylmy direktory Aleksandr Ginsburgyň sözlerine salgylanýan "RIA Nowosti” agentligi habar berýär.
1-nji aprelde waksina ilkinji gezek Kursk welaýatynyň 60 ýaşly ýaşaýjysyna uruldy.
"Ähli standart barlaglar, şol sanda sitokinleriň öndürilişini anyklamak üçin näsagdan gan alyndy. Şonuň netijesinde zerur sitokinleriň öndürilişi babatda başlangyç kiçi üýtgeşmelere syn edilýär" - diýip, Ginsburg aýtdy.
Ol hassa dermanyň takmynan on gezek sanjym ediljekdigini, şonuň üçin esasy netijeleriň biraz soňrak alynjakdygyny belledi. Häzirki wagtda ol adam öýünde, sebitiň onkologiýa merkeziniň gözegçiligi astynda. Indiki sanjymy maý baýramçylyklarynyň aralygynda etmek meýilleşdirilýär.
Aprel aýynda Russiýada rak keseline garşy sanjymlar we CAR-T immunoterapiýasy hökmany saglyk ätiýaçlandyryş ulgamyna girizildi. "Neoonkowak" mRNA sanjymyny kliniki ulanmaklyga rugsat 2025-nji ýylyň noýabr aýynda berildi. Bu derman operasiýa edip bolmaýan ýa-da metastatik melanomaly uly ýaşly hassalary bejermek üçin niýetlenendir.
