Türkmenistanyň Prezidenti Serdar Berdimuhamedow Aşgabada sapar bilen gelen Seýşeller Respublikasynyň daşary işler we diaspora ministri Barri Fory kabul etdi.
Myhman mähirli kabul edilendigi üçin minnetdarlyk bildirdi we öz ýurdunyň Türkmenistan bilen gatnaşyklary ösdürmäge uly gyzyklanma bildirýändigini belledi. Ol döwlet Baştutanyna Seýşeller Respublikasynyň Prezidenti Patrik Ermininiň salamyny ýetirdi.
Serdar Berdimuhamedow dostlukly döwletiň ýolbaşçysyna iň gowy arzuwlaryny beýan etdi we diplomatyň bu saparynyň ikitaraplaýyn gatnaşyklary giňeltmekde möhüm tapgyr boljakdygyna ynam bildirdi.
Duşuşygyň dowamynda bellenilişi ýaly, Türkmenistan öz daşary syýasatyny BMG-niň Baş Assambleýasy tarapyndan ykrar edilen hemişelik Bitaraplyk hukuk ýagdaýyna esaslanyp ösdürýär. Iki ýurt hem durnukly ösüş, parahatçylyk we ynanyşmak ýörelgelerine eýerýär.
Halkara guramalaryň, ilkinji nobatda bolsa, BMG-niň çäklerindäki özara gatnaşyklar maslahatlaşyldy. Prezident Türkmenistanyň başlangyçlaryna berýän goldawy we möhüm Kararnamalarynyň awtordaşy bolup çykyş edýändigi üçin Seýşeller Respublikasyna minnetdarlyk bildirdi.
«Biz geljekde hem ýurtlarymyzyň daşary syýasat edaralary tarapyndan halkara giňişlikde alnyp baryljak işleri utgaşdyrmagy goldarys» diýip, döwlet Baştutany belledi.
Duşuşykda söwda-ykdysady hyzmatdaşlygyň geljegi uly ugurlaryna seredildi. Olaryň arasynda ýangyç-energetika toplumy, himiýa we dokma senagaty, oba hojalygy ýaly pudaklar agzaldy.
Mundan başga-da, ynsanperwer gatnaşyklary, hususan-da, syýahatçylyk ulgamyndaky hyzmatdaşlygy ösdürmek meselesi maslahatlaşyldy.
Prezident özara bähbitli hyzmatdaşlygy ýola goýmak boýunça seýşeller tarapynyň tekliplerine seretmäge taýýardygyny tassyklady.
