Londonda tiramisunyň uzynlygy boýunça täze dünýä rekordy goýuldy. Uzaboýuna 440,6 metr bolan süýjüligi taýýarlamaga ýüze golaý italýan aşpezi gatnaşdy.
Mundan öňki 273,5 metrlik rekord Milanda hasaba alnypdy.
Tiramisu Çelsiniň merkezi ratuşasynda Ginnesiň rekordlar kitabynyň eminleriniň gatnaşmagynda taýýarlanyldy. Rekordyň kabul edilmegi üçin esasy şert, desertiň bütewi bolmagydy. Şol sebäpli aşpezler aýratyn bölekleri birleşdirip, her bir seplenýän ýeri bildirmejek görnüşde krem bilen örtdüler.
Bu äpet süýjülik üçin 19 müň ýumurtga, takmynan 400 kg şeker, 128 müň sany sawoýardi kökesi, 2 tonnadan gowrak maskarpone peýniri sarp edildi. Şunlukda desertiň her böleginiň beýikligi 8 santimetrden, ini bolsa 15 santimetrden pes bolmady.
Rekordyň gurnaýjysy Mirko Riççidir. Ol 2017-nji ýylda hem şeýle rekordy goýupdy, ýöne soňra bu diplomy başga bir topara aldyrypdy. Riççi bu synanyşygy Britaniýada geçirmegini ýurda bolan «minnetdarlyk ädimi» diýip atlandyrdy. Onuň pikiriçe, tiramisu – Italiýanyň dünýä ýaýradan iň täsin desertidir.
Çäre Britaniýanyň şa maşgalasyna we korol Karl III-ä bagyşlandy. Çäreden ýygnanan ähli serişdeler garyplyk bilen göreşýän «Esharelife» gaznasyna geçirildi.
