28-nji aprelde Türkmenistanyň daşary işler ministriniň orunbasary S.Muhammetdurdyýew bilen Müsür Arap Respublikasynyň Türkmenistanda täze bellenen Ilçisi (oturýan ýeri Moskwa şäheri) Hamdy Şaaban Abdelhalim Mohamediň arasynda duşuşyk geçirildi. Gepleşikleriň başynda Ilçi ynanç hatlarynyň nusgalaryny gowşurdy diýip, ministrligiň metbugat gullugy habar berýär.
Türkmen tarapy diplomaty jogapkärli wezipesi bilen gutlap, onuň diplomatik işini ýerine ýetirmeginde zerur bolan ähli ýardamy bermäge taýýardygyny beýan etdi.
Duşuşygyň dowamynda taraplar iki ýurduň arasyndaky syýasy-diplomatik, söwda-ykdysady we medeni-ynsanperwer gatnaşyklaryň häzirki ýagdaýyny hem-de geljekki mümkinçiliklerini ara alyp maslahatlaşdy. Söhbetdeşligiň çäklerinde taraplar ikitaraplaýyn şertnama-hukuk binýadyny giňeltmek hem-de halkara we sebit gün tertibiniň özara gyzyklanma döredýän meseleleri boýunça pikir alyşdy.
Gepleşikleriň netijesi boýunça daşary syýasat edaralarynyň arasynda syýasy geňeşmeleri dowam etdirmek, Ykdysady we ylmy-tehniki hyzmatdaşlyk boýunça bilelikdäki hökümetara türkmen-müsür toparynyň mejlislerini geçirmek barada ylalaşyk gazanyldy.
Şeýle hem taraplar Aşgabatda we Kairde özara Medeniýet günlerini guramak, saglygy goraýyş, bilim we syýahatçylyk ulgamlarynda hyzmatdaşlygy has-da giňeltmek barada özara gyzyklanmalaryny tassyklady.
