Awstraliýaly we ýapon alymlarynyň bilelikdäki ekspedisiýasynyň barşynda, Rýukýu çuňluklarynda 9137 metr rekord derejedäki çuňlukda häzirki wagta çenli mälim bolan jandarlar toparynyň hiç birine degişli edip bolmaýan syrly ýarym dury jandar tapyldy.
Daşky görnüşi boýunça täsin deňiz molýuskasyna meňzeýän bu üýtgeşik beden çuňlukda işleýän apparatlaryň wideokameralary bilen düşürildi. The Mirror neşiri tapyndynyň biologik ylmy klassifikasiýadaky ornunyň näbelliligi bilen, öňdebaryjy deňiz biologlaryny hem çykgynsyz ýagdaýa salandygyny habar berýär.
Ekspedisiýa iki aýa çekdi we bu wagtyň dowamynda hünärmenler Ýuwaş ummanynyň iň çuň üç suwasty jülgesini derňediler. Ak, ýarym dury göwrä Filippin deňziniň düýbünde, deňiz derejesindäki atmosfera basyşyndan müň esse ýokary bolan ekstremal basyş şertlerinde syn edildi. Gözlegçiler jandara wagtlaýynça «Animalia incerta sedis» (biologiki klassifikasiýada orny kesgitlenmedik jandar) diýen statusy berdiler.
Topar bu nämälim jandardan başga-da, 100-den gowrak dürli organizmler toparyny, şol sanda et iýýän gubkalary we çuňlukda ýaşaýan balyk görnüşlerini hasaba aldy. Ekspedisiýanyň baş ylmy işgäri professor Jeýmison çuňlukdaky jülgeleriň haýrangaldyryjy derejede janly-jandarlara baýdygyny aýdýar. Şonuň bilen birlikde, gözlegçiler ummanyň barylmasy şeýle kyn bolan ýerlerinde hem adam yzlarynyň – hapa zyňyndylaryň bardygyny gynanç bilen belleýärler.
Bu gözleg işi planetamyzyň iň az öwrenilen sebitleriniň biri bolan ultra-abissal zolagy mundan beýläk-de öwrenmek üçin daýanç nokadydyr. «Bu gözlegiň maksady, diňe bir çuňlukdaky organizmlere syn etmek bolman, eýsem, geljekde şeýle çuňluklarda geçiriljek ylmy işler üçin esas döretmekdi» diýip, professor hem aýratyn nygtaýar.
