Apple korporasiýasy gyralary biraz egreldilen innowasion ekranly smartfony tanyşdyrmagy meýilleşdirýär.
MacRumors neşiriniň insaýderlere salgylanyp berýän habaryna görä, kompaniýa häzirki OLED-displeýlerden has inçe we has ýagty boljak ýörite Micro-Curved panellerini sargyt etmek üçin eýýäm Samsung-a ýüz tutdy.
Täze tehnologiýanyň ornaşdyrylmagyny 2027-nji ýylda ilkinji iPhone-yň satuwa çykmagynyň 20 ýyllyk ýubileýine gabatlamak meýilleşdirilýär.
Dizaýnerler egreldilen gyralaryň enjamyň ele has oňaýly oturmagyna mümkinçilik berjegini we ekranyň gyralaryndaky kontentiň ýoýulmagynyň öňüni aljakdygyny belleýärler. Şol bir wagtyň özünde, Apple estetikany we funksionallygy esasy orna goýup, Samsung-yň köne "şaglawuk-ekranly" modellerinden tapawutly, özboluşly görnüş döretmäge çalyşýar. Deslapky maglumatlara görä, ýubileý enjamynyň korpusy dolulygyyna diýen ýaly aýnadan ybarat bolar.
Täze modelleriň işlenip düzülmegi bilen bir hatarda, Apple häzirki enjamlary goldamagy hem dowam etdirýär. Aprel aýynyň ahyrynda kompaniýa örän möhüm bolan iOS 26.4.2 we iOS 18.7.8 täzelemelerini çykardy. Bu täzelemeler, ozal ýörite gulluklar tarapyndan ulanyjylary yzarlamak üçin ulanylandygy aýdylýan howpsuzlyk ulgamyndaky çynlakaý boşluklary aradan aýyrýar.
