100 million ýyl mundan ozal Ýeriň ummanlarynda uzynlygy 19 metre ýetip bilýän äpet osminoglar ýaşapdyr. Bu barada Science žurnalynda çap edilen barlag beýanynda aýdylýar.
Hokkaýdo uniwersitetinden Ýasuhiro Ibanyň ýolbaşçylygyndaky halkara paleontologlar topary bu jandarlaryň diňe bir deňiz düýbünde gizlenip ýaşaman, eýsem, şol döwrüň iň iri deňiz süýrenijileri bilen bäsleşmäge ukyply, güýçli ýyrtyjy bolandyklary baradaky netijä geldiler.
Alymlar Ýaponiýanyň we Wankuwer adasynyň kenarlaryndan tapylan gadymy kelleaýaklylaryň 27 sany daşlaşan eňegini (çüňklerini) derňediler.
Ýokary tehnologiýaly skanirleme we sanly rekonstruksiýa usulynyň ulanylmagy, Nanaimoteuthis haggarti görnüşiniň wekiliniň beden uzynlygynyň 1,5–4,5 metr, çüňklerini (dillini) hasaba alanyňda bolsa, umumy ölçeginiň 7–19 metr bolandygyny kesgitlemäge mümkinçilik berdi. Hut şu aýratynlyk hem olary ylma belli bolan iň iri oňurgasyz jandarlaryň birine öwürýär.
Çüňkleriň köneliş derejesiniň derňewi olarda döwükleriň we çyzyk yzlarynyň bardygyny görkezdi. Munuň özi osminoglaryň ammonitleriň gabyklaryny we iri balyklaryň skeletlerini döwmäge ukyply bolandygyny tassyklaýar.
Şeýle-de olaryň çüňklerindäki köneliş yzlarynyň deň däldigi, bu jandarlaryň aw awlanynda bedeniniň bir tarapyny has köp ulanandygyny görkezip, olaryň hem häzirki zaman osminoglary ýaly çylşyrymly nerw ulgamyna we ösen akyla eýe bolandygyny subut edýär.
Täze maglumatlar hek eýýamy baradaky düşünjeleri üýtgedip, oňurgasyz jandarlaryň iýmit zynjyry hem edil akulalardyr mozazawrlaryňka meňzeş bolandyr diýen çaklamany döredýär.
