21–22-nji aprelde Daşary işler ministrliginiň Halkara gatnaşyklary institutynyň rektory Gülşat Ýusupowanyň ýolbaşçylygyndaky Türkmenistanyň wekiliýeti Moskwa şäherinde saparda boldy we rus hyzmatdaşlary bilen özara gatnaşyklary ösdürmek meselelerini maslahatlaşdy. Bu barada ministrligiň metbugat gullugy habar berýär.
Saparyň çäklerinde Russiýa Federasiýasynyň Daşary işler ministrliginiň Moskwa döwlet halkara gatnaşyklary institutynyň (Uniwersitetiniň) rektory Anatoliý Torkunow we Halkara gatnaşyklary fakultetiniň dekany Andreý Suşensow bilen duşuşyk geçirildi. Taraplar 2017-nji ýylyň oktýabr aýynda gol çekilen ylalaşygyň esasynda ylmy-bilim gatnaşyklarynyň mümkinçiliklerine garady.
Ýokary okuw mekdepleriniň ýolbaşçylary talyplary we mugallymlary yzygiderli alyşmagyň mümkinçiliklerini, halkara gatnaşyklary we energetika diplomatiýasy ulgamynda bilelikdäki bilim maksatnamalaryny taýýarlamagy, şeýle hem talyplary halkara we jemgyýetçilik-diplomatik işlere çekmäge gönükdirilen başlangyçlary amala aşyrmagy maslahatlaşdy.
Şeýle hem G.Ýusupowanyň Russiýa Federasiýasynyň Daşary işler ministrliginiň GDA ýurtlary boýunça üçünji departamentiniň direktory Aleksandr Sternik bilen duşuşygy boldy, onda ikitaraplaýyn gepleşikleriň ösüşi barada pikir alşyldy.
22-nji aprelde MGIMO-da mugallymlaryň, bilermenleriň we talyplaryň gatnaşmagynda tegelek stol maslahaty geçirildi. Gatnaşyjylar ýokary okuw mekdepleriniň arasyndaky hyzmatdaşlygy ösdürmegi, magistrantlaryň we mugallymlaryň akademiki alyşmak maksatnamalaryny durmuşa geçirmegi, talyplar üçin gysga möhletli özara tejribelik okuwlaryny we mugallymlaryň saparlaryny guramagy, diplomatik gulluk hem-de energetika diplomatiýasy ulgamynda bilelikdäki bilim maksatnamalaryny işläp düzmegi, ylym-bilermenler ulgamynda hyzmatdaşlygy ýola goýmagy, daşary ýurt dillerini okatmagyň usulyýetini, şol sanda türkmen dili boýunça bilelikdäki okuw kitabyny neşir etmegi we ylmy işleri özara çap etmegi ara alyp maslahatlaşdy.
Duşuşyklaryň netijeleri boýunça taraplar halkara hünärmenleri taýýarlamaga gyzyklanmalaryny tassyklady we bilelikdäki taslamalary amala aşyrmak boýunça anyk ädimleri kesgitledi.
