Magtymguly adyndaky Türkmen döwlet uniwersiteti bilen Italiýanyň Gabriele d’Annunsio adyndaky uniwersiteti onlaýn-maslahat geçirip, hyzmatdaşlyk hakynda ylalaşyga gol çekdi.
Duşuşyk 22-nji aprelde iki ýokary okuw mekdebiniň ýolbaşçylarynyň we mugallymlarynyň gatnaşmagynda boldy. Taraplar ýokary bilim we ylym ulgamynda özara gatnaşyklaryň geljegini ara alyp maslahatlaşdy hem-de hyzmatdaşlygy ösdürmäge taýýardyklaryny tassyklady.
Ýokary okuw mekdepleriniň arasynda gol çekilen resminama hünär derejesini ýokarlandyrmak we ýokary derejeli hünärmenleri taýýarlamak boýunça bilelikde iş alyp barmagy göz öňünde tutýar. Bu hyzmatdaşlyk mugallymlaryň we talyplaryň özara tejribe alşygyny, okatmagyň usulyýetini kämilleşdirmek boýunça tejribe alyşmagy, iki uniwersitetiň professorlarynyň we mugallymlarynyň gatnaşmagynda talyplar üçin hünär ýokarlandyryş okuwlaryny guramagy, bilelikdäki ylmy barlaglary geçirmegi, şeýle hem uniwersitetlerde geçirilýän halkara çärelerine gatnaşmagy öz içine alýar.
Ýokary okuw mekdepleriniň arasynda, şol sanda Italiýanyň Türkmenistandaky Ilçihanasynyň goldawy bilen eýýäm hyzmatdaşlygyň ýola goýlandygy bellenildi. Talyplar we mugallymlar yzygiderli Italiýada tejribe geçýär, bilim tejribeleri we okatmagyň döwrebap usullary bilen tanyşýar.
Gabriele d’Annunsio uniwersiteti türkmen ýokary okuw mekdepleriniň esasy hyzmatdaşlarynyň biri hökmünde görülýär. Bu okuw mekdebi taryh, inženerçilik, lukmançylyk we ynsanperwer ylymlary ulgamynda barlaglary alyp barýar, şeýle hem Merkezi Aziýanyň uniwersitetleri bilen bilelikdäki taslamalara gatnaşýar.
