Fransiýanyň prezidenti Emmanuel Makron 2027-nji ýylda özüniň ikinji prezidentlik möhleti tamamlanandan soň, syýasaty dowam etdirmegi meýilleşdirmeýändigini mälim etdi. Bu barada ol Nikosiýadaky fransuz-kipr mekdebiniň okuwçylary bilen bolan duşuşygynda gürrüň berdi.
«Ilki men beýleki prezidentlere maslahat berip, ministr bolup işledim, soňra bolsa partiýa döretmek arkaly ýagdaýy has çalt we düýpli üýtgedip biljekdigimizi pikir etdim» diýip, Fransiýanyň lideri düşündirdi.
Onuň sözlerine görä, prezidentlik wezipesi onuň üçin karýera ädimi däl-de, ynanýan pikirlerini durmuşa geçirmek we gymmatlyklar ugrundaky göreş tapgyry bolupdyr.
«Men oňa çenli hem syýasat bilen meşgullanmadym, mundan soň hem meşgullanmaryn» diýip, Makron belledi we munuň özi üçin, ilki bilen, jogapkärçilik we işe bolan höwesdigini düşündirdi.
Fransuz neşirleri bu sözleri Makronyň uly syýasatdan gidýändigi baradaky resmi bildiriş hökmünde kabul etdiler.
Fransiýanyň konstitusiýasyna laýyklykda, 2017-nji ýyldan bäri prezident wezipesini eýeläp gelýän Emmanuel Makron yzly-yzyna üçünji möhlete dalaş edip bilmeýär. Ýurtda indiki prezident saýlawlarynyň ilkinji tapgyry 2027-nji ýylyň aprel aýyna meýilleşdirildi.
Prezidentiň özi işiniň jemleýji döwrüniň içerki we daşarky krizisleriň täsirinde gazanylan reformalary gorap saklamak zerurlygy sebäpli kyn boljakdygyny boýun aldy.
