Helsinkide uzynlygy 1191 metr bolan «Kruunuwuorensilta» köprüsi açyldy. Ol Finlýandiýadaky iň uzyn we iň belent köpri boldy.
Bu köpri Korkeasaari we Kruunuwuorenranta etraplaryny birleşdirýär. Desga diňe pyýadalar, welosipedçiler we jemgyýetçilik ulaglary üçin niýetlenendir. Onuň üstünden awtoulaglaryň geçmegi göz öňünde tutulmadyk.
Bu desga Kruunuwuorenranta etrabyndan şäheriň merkezine çenli bolan aralygy 11 kilometrden 5,5 kilometre çenli gysgaltmaga mümkinçilik berýär.
Şäheriň häkimi Daniýel Sazonow: «Kruunuvuorensilta köprüsi — Helsinkiniň täze, özboluşly we göze gelüwli ýeridir. Bu desga ýakyn we uzak ýerlerden gelýän myhmanlary özüne çekjek nokada öwrüler. Täze köpri biziň Helsinki baradaky düşünjämizi düýbünden üýtgedýär» diýip belledi.
Şäherde soňky wagtlarda başga-da birnäçe desgalar açyldy. Olardan Ýurýonkatu ýüzüş zaly, däp bolan tomusky öýjagazy bolan Seurasaari açyk asman astyndaky muzeýi, şeýle-de Merkezi wokzalda «Taulu» restoranyny bellemek bolar.
