Altaý goraghanasynyň alymlary çagalaryň çalt uka gitmegini üpjün edýän we stres derejesini peseldýän täze usuly patentleşdirdiler. Bu usulda Altaýyň goralýan çäklerinde ýaşaýan guşlaryň hakyky owazlarynyň audioýazgylary ulanylýar. Çagalar bagynda geçirilen synaglar mekdebe çenli ýaşly çagalaryň uka gitme wagtynyň takmynan iki esse gysgalandygyny görkezdi.
Teklip edilýän usulyň esasy mazmuny günorta uky wagtynda çagalara azyndan 15 minutlap guş seslerini diňletmekden ybarat. Emeli usulda döredilen tebigat seslerini ulanýan daşary ýurt maksatnamalaryndan tapawutlylykda, Altaýyň bu täzeçilligi diňe tebigy we hakyky owazlara esaslanýar.
Taslamany işläp düzenleriň aýtmagyna görä, bu çemeleşme bilim edaralarynda günüň tertibini kadalaşdyrmaga, çagalaryň fiziki we psihologik ýagdaýyny gowulandyrmaga hem-de olaryň emosional durnuklylygyny üpjün etmäge mümkinçilik berýär.
Barlaga jemi 53 çaga gatnaşdy. Iki hepde dowam eden synagyň birinji tapgyrynda çagalar doly dymşyklykda, ikinji tapgyrynda bolsa ýörite taýýarlanan audioýazgylar astynda ukyga gitdiler. Iň täsirli netijeler şu görkezijilerde hasaba alyndy:
4–5 ýaşly çagalar: uka gitme wagty ortaça 46 minutdan 28 minuta çenli gysgaldy.
6–7 ýaşly çagalar: Bu görkeziji 23 minutdan 16 minuta çenli düşdi.
Synaga gözegçilik eden psihologlar bu usulyň çagalaryň ukudan oýanan wagtyndaky umumy ýagdaýyna hem oňyn täsir edýändigini bellediler. Çagalar ukudan oýananlarynda özlerini has rahat we asuda duýdular. Bu bolsa tebigy sesleriň dynç alşyň hilini ýokarlandyrmakda örän täsirli guraldygyny tassyklaýar.
