Bristol we Buffalo uniwersitetleriniň barlagçylary süýjülikler hem-de tiz tagamlary şekillendirilýän wideolara tomaşa etmegiň berhiz tutýan adamlara işdäsini saklamaga kömek edip biljekdigi baradaky netijä geldiler.
Barlaga 19 ýaşdan 77 ýaş aralygyndaky 840 adam gatnaşdy. Tejribeleriň birinde gatnaşyjylara şokoladly süýjülikler baradaky wideorolikler görkezildi. Berhiz tutýan adamlar has ýokary kaloriýaly görnüşlere has uzak wagtlap syn etdiler, emma soňra olara hödürlenen şokoladdan has az iýdiler. Ozaldan bolan wizual gatnaşygy süýji iýmäge bolan islegi gowşatdy.
Başga bir tejribede bolsa, gatnaşyjylara pizza, burger we çipsi ýaly iýmitleriň wideolary peýdaly iýmitler (salatlar, ýogurtlar, smuzi) baradaky wideolar bilen garyşyk görnüşde görkezildi. Berhiz tutýan adamlaryň hut zyýanly iýmitleriň ýanynda has köp durýandygy we bu hili kontenti ortaça 50% töweregi has uzak diňleýändigi/seredýändigi mälim boldy.
«Biz bu prosese "kross-modal doýma" diýip at berýäris. Adam iýmiti fiziki taýdan däl-de, wizual görnüşde sarp etmek arkaly iýmek islegini bölekleýin kanagatlandyryp bilýär. Bu ýagdaý sosial ulgamlarda iýmit baradaky kontentlere tomaşa etmegiň näme üçin hemişe adamlaryň has köp iýmegine getirmeýändigini düşündirmäge kömek edýär» diýip, Buffalo uniwersitetiniň marketing boýunça dosenti we barlagyň awtordaşy Arun Lakşman düşündirýär.
«Bu geň görnüp biler, emma biziň netijelerimiz adamlaryň — aýratyn-da iýmitlenişine gözegçilik etmäge synanyşýanlaryň — iýmitli wizual kontentleri öz-özüňi kadalaşdyryş guraly hökmünde ulanyp biljekdigini görkezýär. Şeýle şekiller bilen wizual gatnaşykda bolmak, iýmiti hakykatda sarp etmezden oňa bolan güýçli islegi kanagatlandyrmaga ýardam edip biler» diýip, barlagyň ýolbaşçysy, Bristol uniwersitetiniň marketing boýunça mugallymy Ester Kang belledi.
