Aşgabatda BMG-niň Ösüş Maksatnamasynyň (UNDP) we Global ekologiýa gaznasynyň (GEF) bilelikdäki taslamasynyň çäklerinde «Ýaş tebigatçy» jemgyýetçilik guramasy tarapyndan guralan ýaşlar üçin okuw maslahaty geçirildi.
«Ýaş tebigatçy» guramasynyň resmi saýtynyň habar bermegine görä, maslahat «Bouygues Turkmen» kompaniýasynyň edarasynda geçirilip, ol Bütindünýä Ýer gününiň öňüsyrasyndaky ekologik başlangyçlaryň birine öwrüldi.
Amyderýa döwlet tebigy goraghanasyna guralan eko-syýahatyň dowamy bolan bu çäre ekologiýa baradaky bilimleri ýokarlandyrmaga we howanyň üýtgemegi bilen baglanyşykly meseleleri öwrenmäge gönükdirildi.
Okuw maslahatynyň dowamynda gatnaşyjylar «Climate Fresk» usulyýetini ulanmak arkaly howanyň üýtgemeginiň sebäplerini we netijelerini giňişleýin seljerdi. «Bouygues Turkmen» kompaniýasynyň hünärmenleriniň gatnaşmagynda geçirilen okuw ýaş tebigatçylara alan bilimlerini öz deň-duşlaryna ýetirmek üçin taýýarlanmaga mümkinçilik berdi.
Maslahat ýaşlaryň ekologik wagyz-nesihat işlerine işjeň gatnaşmagy üçin zerur bolan endikleri kemala getirmäge gönükdirildi.
Guramaçylar Türkmenistanyň döwlet goraghanalarynyň işine we biodürlüligi goramak meselelerine aýratyn üns berdi. Amyderýa goraghanasynyň mysalynda dürli görnüşleriň iýmit zynjyryndaky orny öwrenildi hem-de ösümlik we haýwanat dünýäsiniň hatda ýekeje wekiliniň ýok bolmagynyň hem ekoulgama ýetirýän zyýanyna baha berildi.
Çäre global ýylama garşy göreşmekde we Aral deňziniň giňişliginiň tebigy baýlyklaryny gorap saklamakda innowasion tehnologiýalary ulanmak baradaky pikir alyşmalar bilen tamamlandy.
