Magdeburg ybadathanasyndan tapylan galyndylaryň imperator Otto I-niňkidigi genetiki derňewler arkaly tassyklandy. Bu barada alymlar DNK barlaglaryny geçirenlerinden soň habar berdiler.
Galyndylar 2025-nji ýylda sarkofagyň abatlaýyş işleri mahalynda tapylypdy. Tabyt açylandan soň, süňkleriň takmynan 60 ýaşyndaky we boýy 1,80 metr bolan erkek adama degişlidigi anyklandy. Şol döwür üçin (orta asyrlar) bu boý ortaça görkezijiden has beýik hasaplanýar.
DNK nusgalary Bamberg ybadathanasyndan tapylan we patyşa Genrih II bilen baglanyşykly galyndylar bilen deňeşdirildi. Derňew üçin arheogenetik Harald Ringbauer tarapyndan işlenip düzülen garyndaşlyk derejesini kesgitleýiş usuly ulanyldy.
Netijeler Otto I bilen Genrih II-niň arasyndaky taryhy maglumatlaryna laýyk gelýän üçünji derejeli garyndaşdygyny tassyklady.
«Beýik Otto» ady bilen tanalýan Otto I (912–973) gündogar-frank patyşalygyny berkidip, ony Italiýa bilen birleşdirdi we 1806-njy ýyla çenli dowam eden Mukaddes Rim imperiýasynyň düýbüni tutdy. Ol diri wagty «Beýik» we «Watanyň atasy» diýlip atlandyrylypdyr.
Onuň döwründe Magdeburg şäheri aýratyn ähmiýete eýe bolup, 968-nji ýylda ol ýerde arhiýepiskoplyk döredildi. Şäher syýasy we dini merkez hökmünde imperatoryň esasy ýerleriniň birine öwrüldi.
