Reuters agentliginiň SpaceX-iň IPO (paýnamalaryň köpçülikleýin satuwy) resminamalaryna salgylanyp berýän habaryna görä, kompaniýanyň esaslandyryjysy Ilon Mask baş direktoryň, tehniki direktoryň hem-de dokuz agzadan ybarat bolan direktorlar geňeşiniň başlygynyň wezipelerini saklap galar.
Gözegçiligi güýçlendirmek üçin, Maska we insaýderleriň çäkli toparyna beýleki maýadarlaryň kagyzlaryndan has ýokary artykmaçlyga eýe bolan ses berme hukugyny berýän paýnamalar berler.
SpaceX-iň paýnamalarynyň ilkinji köpçülikleýin satuwyny 2026-njy ýylyň iýun aýynda geçirmegine garaşylýar. Kompaniýa eýýäm SEC-e (Gymmatly kagyzlar we biržalar boýunça komissiýa) degişli arzasyny tabşyrdy. Kompaniýa takmynan 1,75 trillion dollar bazar gymmaty bilen 75 milliard dollar maýa goýum çekmegi meýilleşdirýär. Bu görkeziji SpaceX-iň gazna bazaryndaky ilkinji çykyşyny taryhda iň uly satuwa öwrüp biler.
Maskyň 2025-nji ýyldaky aýlygynyň bary-ýogy 54 080 dollar bolandygyna garamazdan, IPO-dan soň ol birnäçe milliard dollar gymmatynda paýnama görnüşindäki sylag alyp biler. Resminamalarda beýleki ýolbaşçylaryň girdejileri barada hem maglumatlar bar: prezident we operasion direktor Gwinn Şotwell geçen ýyl 85,8 million dollar, maliýe direktory Bret Jonsen bolsa 9,8 million dollar gazandy.
SpaceX köp gezeklik Falcon raketalar topary, Starship planetalarara ulgamy we Starlink global hemra internet ulgamy bilen meşgullanýan ABŞ-nyň öňdebaryjy hususy aerokosmos kompaniýasy bolup durýar.
