Voyager Technologies aerokosmos startapynyň baş direktory Dilan Teýlor adamlaryň şu onýyllygyň ahyryna çenli Aýy işjeň öwrenmäge başlajakdygyny, indiki onýyllygyň başynda bolsa ol ýerde hemişelik ýaşap we işläp biljekdigini aýtdy.
Onuň sözlerine görä, birinji tapgyrda Aý bazasy degişli ýaşaýyş üpjünçilik ulgamlary bolan çişirilen ýaşaýyş giňişligi bolar.
"Soňra, 2030-njy ýyllarda, Nýu-Ýorkdaky jaýyňyzyň daş işigindäki basgançagynda oturyp, Aýyň ýüzündäki yşyklary synlap bilersiňiz, sebäbi adamlar ol ýerde ýaşap we işläp başlarlar" - diýip, startapyň baş direktory ynanýar.
Ilon Mask ozal on ýyla ýetmän Aýda öz-özüni üpjün edýän şäher döretmek baradaky meýilnamasyny yglan edipdi. Jeff Bezos tarapyndan esaslandyrylan Blue Origin kompaniýasy Aýda hemişelik baza gurmaga ünsi jemlemek üçin, hatda ýanwar aýynda suborbital syýahatçylykdan ýüz hem öwürdi.
Şeýle hem, Teýlor kosmos infrastrukturasyna maýa goýumlarynyň artandygyny belledi. Ol geçen ýyl telearagatnaşyk hemralaryny uçurmaklyga 45 milliard dollardan gowrak puluň gönükdirilendigini, 2024-nji ýylda bolsa bu maksat üçin 25 milliard dollara golaý puluň harçlanandygyny aýtdy.
"Kosmosda entek hiç mahal şeýle gyzgalaňly bolmandy" - diýip, Voyager Technologies kompaniýasynyň ýolbaşçysy ýöriteleşdirilen maksatnamalar üçin maliýeleşdirişiň ýagdaýyny beýan edýär.
Mundan başga-da, Teýloryň çaklamagyna görä, kosmosda maglumat merkezleri takmynan ýene bäş ýyldan peýda bolar, ýöne munuň üçin ýylylygy gapdala sowmak meselesini çözmeli.
