Dubaýda dünýäde ilkinji gezek aerotaksiler üçin niýetlenen täjirçilik wertiporty (wertikal uçuş we gonuş duralgasy) açyldy. Bu desga halkara howa menziliniň çäginde ýerleşýär we dikligine uçýan hem-de gonýan elektrikli apparatlary (eVTOL) kabul etmäge taýýar edildi.
Meýdany takmynan 3100 inedördül metr bolan bu toplum ýylda 170 müňe çenli ýolagça hyzmat etmäge niýetlenendir we ol iki sany gonuş meýdançasy bilen enjamlaşdyrylandyr. Bu desga şäheriň täze ulag ulgamynyň bir bölegine öwrüler.
Infrastrukturany ösdürmek işi bilen «Skyports Infrastructure» kompaniýasy meşgullanýar, gatnawlary bolsa Dubaýda alty ýyl möhlet bilen eksklýuziw işlemek hukugyny alan «Joby Aviation» kompaniýasy amala aşyrar. Wertiport çalt zarýad beriş ulgamy bilen üpjün edilen bolup, ol diňe bir aerotaksileri däl, eýsem dikuçarlary hem kabul edip bilýär.
«Joby» kompaniýasy eýýäm sebitde synag uçuşlaryny geçirdi we öz tehnikalaryny sertifikatlaşdyrmak işlerini dowam etdirýär. Geljekde şäheriň dürli etraplarynda goşmaça meýdançalary açmak meýilleşdirilýär.
Täjirçilik reýsleriniň 2026-njy ýylyň ahyrynda ýola goýulmagyna garaşylýar. Eger bu taslama doly durmuşa geçirilse, Dubaý yzygiderli aerotaksi gatnawlary bolan dünýädäki ilkinji şäher bolar.
