Talaat Moustafa Group kompaniýasy Kairiň golaýynda täze The Spine ("Oňurga") şäherini gurmak üçin 27 milliard dollarlyk taslamany yglan etdi diýip, Bloomberg habar berýär.
Taslama 2 million inedördül metrden gowrak meýdany öz içine alýan ýaşaýyş jaýlary, söwda we ofis jaýlary bolan 165 diňiň gurluşygyny göz öňünde tutýar. Kompaniýanyň baş direktory Hişam Talaat Mustafanyň sözlerine görä, gurluşygyň tamamlanjak senesi heniz kesgitlenmedi.
Taslamanyň 155 müňden gowrak iş ornuny döretmegine we her ýyl millionlarça syýahatçyny özüne çekmegine garaşylýar.
Bu başlangyç Müsürde Pars aýlagy ýurtlarynyň maýa goýumlary bilen goldanylýan birnäçe iri taslamalaryň dowamydyr. Kompaniýa ozal BAE-niň 35 milliard dollar maýa goýan Ras al-Hekma şypahanasynyň gurluşygyna gatnaşypdy.
Müsür Kairiň gündogarynda täze administratiw paýtagty hem gurýar. Taslama bilen 2015-nji ýylda tanyşdyryldy we 2017-nji ýyldan bäri gurluşyk işleri işjeň alnyp barylýar. Täze şäheri takmynan 7 million ilatly administratiw we maliýe merkezine öwürmek göz öňünde tutulýar.
