2026-njy ýylyň 18-nji aprelinde Türkiýe Respublikasyna amala aşyrylan saparyň çäklerinde Türkmenistanyň daşary işler ministri Raşid Meredowyň halkara guramalaryň ýolbaşçylary bilen birnäçe netijeli duşuşyklary boldy. Gepleşikleriň dowamynda ählumumy howpsuzlyk, ykdysady hyzmatdaşlyk we siwilizasiýalaryň arasyndaky dialogy ösdürmek meselelerine garaldy.
Ministr Raşid Meredowyň Ýadro synaglaryny ählumumy gadagan etmek barada şertnamasy guramasynyň (CTBTO) Ýerine ýetiriji sekretary Robert Floýd bilen duşuşygynda ýadro ýaraglarynyň ýaýramazlygy we ýaragsyzlanmak prosesleri ara alnyp maslahatlaşyldy. Türkmenistanyň bu Şertnamanyň ýörelgelerine ygrarlydygy bellenilip, Şertnamanyň 30 ýyllygyna bagyşlanyp ýurtda sebit çärelerini geçirmegiň hem-de halkara monitoring ulgamy boýunça hyzmatdaşlygy ösdürmegiň, şeýle hem milli hünärmenleri taýýarlamagyň mümkinçilikleri öwrenildi.
Saparyň çäklerinde geçirilen indiki duşuşyk Türki döwletleriň Söwda-senagat edaralarynyň birleşiginiň Baş sekretary Adem Kula bilen boldy. Taraplar türki döwletleriň arasyndaky söwda-ykdysady gatnaşyklaryň häzirki derejesine ýokary baha berip, Türkmenistanyň Söwda-senagat edarasynyň 2024-nji ýylda bu Birleşige kabul edilmeginiň ähmiýetini nygtady. Gepleşikleriň özeni bu formatdaky ýurtlaryň arasynda bilelikdäki önümçilik zynjyrlaryny döretmek meselelerine gönükdirildi.
Şeýle-de, Raşid Meredow BMG-niň Baş sekretarynyň orunbasary, BMG-niň Siwilizasiýalaryň bileleşiginiň Ýokary wekili Migel Anhel Moratinos bilen duşuşdy. Söhbetdeşligiň dowamynda parahatçylyk medeniýetini ilerletmek we siwilizasiýalaryň arasyndaky dialogy ösdürmek barada pikir alşyldy. Türkmen tarapy ýurduň hemişelik bitaraplyk derejesiniň netijeli halkara gatnaşyklary we özara düşünişmegi berkitmekde täsirli gural bolup hyzmat edýändigini ýene bir gezek tassyklady.
