2026-njy ýylyň 17-18-nji aprelinde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky wekiliýet Antalýada «Geljegi meýilleşdirmek, nämälimlikleri dolandyrmak» şygary astynda geçirilen Bäşinji Antalýa diplomatik forumyna gatnaşdy. Bu barada Türkmenistanyň Daşary işler ministrligi habar berýär.
Forumyň dowamynda türkmen wekiliýetiniň ýolbaşçysy Merkezi Aziýa döwletleriniň ählumumy ornuna bagyşlanan mejlisde çykyş edip, sebit durnuklylygyny berkitmek, energetika howpsuzlygyny üpjün etmek we halkara ulag geçelgelerini ösdürmek boýunça Türkmenistanyň garaýyşlaryny beýan etdi.
Çykyşda Türkmenistanyň başlangyjy bilen döredilen täze konsultatiw duşuşyklaryň ähmiýeti we energiýa serişdelerini diwersifikasiýalaşdyrmak, hususan-da TAPI gaz geçirijisi hem-de elektrik energiýasynyň eksporty boýunça alnyp barylýan işler aýratyn bellenildi.
Şeýle hem Türkmenistanyň energetika durnuklylygy barada BMG-niň çäklerinde öňe süren kararnamalarynyň iş ýüzünde durmuşa geçirilişi we «Türkmenistan – Hytaý» gaz geçirijisiniň sebitdäki hyzmatdaşlykda tutýan orny barada durlup geçildi.
Mundan başga-da, Merkezi Aziýanyň Gündogar – Günbatar we Demirgazyk – Günorta ugurlarynda möhüm ulag merkezi hökmünde eýeleýän ornuny has-da pugtalandyrmak üçin sebit ýurtlarynyň tagallalaryny utgaşdyrmagyň zerurlygy nygtaldy.
