Aşgabatda şu aýyň dowamynda geçiriljek Türkmen-hytaý işewürler forumyna we sergisine işjeň taýýarlyk görülýär. Bu barada şenbe güni geçirilen Ministrler Kabinetiniň mejlisinde wise-premýer Nökerguly Atagulyýew habar berdi.
Hökümet Başlygynyň orunbasarynyň aýtmagyna görä, çärelere gatnaşmak üçin Hytaý Halk Respublikasynyň maşyngurluşyk, nebitgaz pudagy, sanly ulgamlar, oba hojalygy we logistika ýaly ugurlarda işleýän 80-den gowrak döwlet edara-guramalary we hususy kompaniýalary eýýäm hasaba alyndy.
Prezident Serdar Berdimuhamedow Türkmenistanyň daşary ýurtly hyzmatdaşlar, aýratyn-da Hytaý bilen söwda-ykdysady gatnaşyklary ösdürmäge uly ähmiýet berýändigini nygtady. Döwlet Baştutany öňde duran çäreleriň ýokary guramaçylyk derejesini üpjün etmegi tabşyrdy.
Forumyň Türkmenistanyň ministrlikleriniň, Senagatçylar we telekeçiler birleşmesiniň wekilleri bilen hytaýly kärdeşleriniň arasynda täze şertnamalary baglaşmak hem-de ikitaraplaýyn hyzmatdaşlygyň geljegi uly ugurlaryny ara alyp maslahatlaşmak üçin amatly meýdança öwrülmegine garaşylýar.
