Eger Kongres kanunyň taslamasyny tassyklasa, ABŞ-nyň Maliýe ministrligi prezident Donald Trampyň portreti çekilen 250 dollarlyk banknoty çap etmäge taýýar. Bu barada Pudagyň ýolbaşçysy Skott Bessent Ak Tamda geçirilen brifingde yglan etdi.
ABŞ-nyň häzirki kanunçylygy pul birliginde diri adamlaryň portretlerini ulanmagy gadagan edýär. Şeýle-de bolsa, Kongres häzirki wagtda ýörite Tramp üçin kadadan çykma etmäge mümkinçilik berjek başlangyja seredýär. Wekiller Palatasynyň Gazna kanunlary boýunça komiteti respublikan Jo Wilson tarapyndan hödürlenen kanun taslamasyny gözden geçirýär. Eger Kongres kanunyň taslamasyny kabul etse, Trampyň özi oňa gol çekmeli bolar.
"Maliýe ministrliginde biz bu zatlara öňünden taýýarlyk görýäris, şonuň üçin kanun kabul edilse, biz eýýäm taýýar, ýöne kanuna eýereris" - diýip, Bessent aýtdy.
Täze kagyz puly çykarmak pikiri ABŞ-nyň 250 ýyllygyny bellemäge taýýarlyk bilen baglanyşykly.
Maliýe ministrligi ozal ABŞ-nyň banknotlarynda Trampyň golunyň peýda boljakdygyny hem yglan edipdi. Mundan başga-da, federal komissiýa ýurduň ýubileýi mynasybetli prezidentiň portreti çekilen ýadygärlik altyn teňňeleriň dizaýnyny eýýäm tassyklady.
