18-nji aprelde geçirilen Ministrler Kabinetiniň mejlisinde wise-premýer Hojamyrat Geldimyradow ýurduň banklarynyň ýyllyk maliýe hasabatlaryna halkara standartlaryna laýyklykda audit barlaglaryny geçirmek boýunça görülýän çäreler barada hasabat berdi.
Bu işler «Karz edaralary we bank işi hakynda», «Auditorçylyk işi hakynda» Türkmenistanyň Kanunlaryny, şeýle hem buhgalterçilik hasaba alnyşy we auditi özgertmegiň degişli Maksatnamasyny durmuşa geçirmegiň çäklerinde amala aşyrylýar.
Prezident Serdar Berdimuhamedow hasabaty diňläp, bank ulgamynyň işini mundan beýläk-de kämilleşdirmegiň aýratyn ähmiýete eýedigini nygtady.
Döwlet Baştutany hödürlenen teklipleri makullap, wise-premýere ýurduň maliýe edaralarynyň işiniň aýdyňlygyny we netijeliligini üpjün etmek bilen, audit barlaglarynyň degişli derejede geçirilmegini guramagy tabşyrdy.
