18-nji aprelde Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ykdysadyýetiň dürli pudaklarynda bitirilen işleriň netijeleri jemlendi we ýakyn döwür üçin meýilnamalar bellenildi. Bu barada «Watan» habarlar gepleşiginde mälim edildi.
Mejlisiň dowamynda adam hukuklary, migrasiýa we senagat howpsuzlygy ulgamlarynda milli kanunçylygy kämilleşdirmek, şeýle hem gurluşyk toplumynda täze milli çykdajy-ölçeg binýadyny ornaşdyrmak meseleleri maslahatlaşyldy.
Möwsümleýin oba hojalyk işlerine: gowaça ekişine, bugdaýa ideg edilmegine we Türkmen bedewiniň baýramyna görülýän taýýarlyk işlerine aýratyn üns berildi. Mundan başga-da, jemgyýetçilik ulaglarynyň maddy-enjamlaýyn binýadyny döwrebaplaşdyrmak we Gökderede hem-de «Awaza» milli syýahatçylyk zolagynda çagalaryň tomusky dynç alşyny guramak boýunça meýilnamalara garaldy.
Döwlet Baştutany Ministrler Kabinetiniň Başlygynyň ähli orunbasarlarynyň we Mejlisiň ýolbaşçysynyň hasabatlaryny diňläp, birnäçe resminama gol çekdi we ýurduň mundan beýläk-de gülläp ösmegini üpjün etmek boýunça anyk tabşyryklary berdi.
