«Digital Dubai» edarasy döwlet gullukçylarynyň 50 müňüsine emeli aň (EA) bilen işlemek endiklerini öwretmek üçin resmi taýdan «AI+» atly uly göwrümli okuw maksatnamasyna başlady. Dubaý hökümetiniň Kadrlar departamenti bilen bilelikde durmuşa geçirilýän bu başlangyç, döwlet işgärlerine tehnologiýalary diňe ulanmak bilen çäklenmän, eýsem, täzeçil döwlet hyzmatlaryny döretmekde hem işjeň hyzmatdaşlara öwrülmäge çagyrýar.
Maksatnama her bir işgäriň wezipesine görä ýöriteleşdirilen okuw ugurlaryny öz içine alýar. Meselem, ýolbaşçylar tehnologiýalary ornaşdyrmagyň strategiýalaryna we dolandyryş usullaryna üns berseler, hünärmenler «promt-inžiniring» (sorag-jogap gurallaryny düzmek) we emeli aň kömekçileri arkaly gündelik işleri awtomatlaşdyrmak ýaly amaly endikleri özleşdirerler. «Digital Dubai-nyň» baş direktory Hamad Obeýd Al Mansuri bu maksatnamanyň esasy özeninde raýatlaryň isleglerini öňünden çaklap bilýän kämil hyzmatlary döretmegiň durandygyny nygtady.
Kadrlar departamentiniň ýolbaşçylarynyň belleýşi ýaly, bu taslama döwlet apparatynyň netijeliligini ýokarlandyrmaga we edara düzümlerinde hemişelik innowasiýa medeniýetini ösdürmäge gönükdirilendir. Bu başlangyç emirligiň sanly transformasiýa ugrundaky dowamly syýasatynyň möhüm bölegi bolup, öňem bu ugurda kiberhowpsuzlygy üpjün etmek we galplyga garşy göreşmek boýunça köp sanly kampaniýalar üstünlikli geçirilipdi.
