17-nji aprelde Mary welaýatynda «Galkynyş» gaz käniniň dördünji tapgyryny özleşdirmek boýunça işlere badalga bermek dabarasy boldy. Çärä Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Hytaý Kommunistik partiýasynyň Merkezi Komitetiniň Syýasy býurosynyň hemişelik komitetiniň agzasy, HHR-iň Döwlet Geňeşiniň Premýeriniň birinji orunbasary Din Sýuesýan gatnaşdy. Bu barada «Watan» habarlar gepleşiginde habar berildi.
Taslama gaz öndürmek üçin täze ulanyş guýularyny burawlamagy we ýylda goşmaça 10 milliard kub metr harytlyk gazy taýýarlaýan desganyň gurluşygyny öz içine alýar.
Türkmenistanyň energetika syýasaty ýangyç-energetika toplumyny tehnologik taýdan döwrebaplaşdyrmaga we eksport ugurlaryny diwersifikasiýalaşdyrmaga gönükdirilendir.
Dabarada söz sözlän türkmen halkynyň Milli Lideri Hytaýyň ýurduň strategik hyzmatdaşydygyny, «Galkynyş» känini özleşdirmegiň dördünji tapgyrynyň işe girizilmeginiň bolsa Türkmenistanyň iri energetika döwleti hökmündäki ornuny has-da berkitjekdigini nygtady.
HHR-iň Döwlet Geňeşiniň Premýeriniň birinji orunbasary Din Sýuesýan öz çykyşynda bu taslamanyň gaz ulgamyndaky ikitaraplaýyn hyzmatdaşlygy täze derejä çykarjakdygyny belledi.
Dabaranyň çäklerinde resmi adamlar döwrebap tehnologiýalaryň we Türkmenistanyň Prezidentiniň goldaw bermeginde satyn alnan geofiziki abzallaryň sergisi bilen tanyşdy.
Gurbanguly Berdimuhamedow täze tapgyryň ilkinji guýusynyň buraw işlerine ak pata berdi. Çäre geljekki desganyň düýbüne ýadygärlik sene ýazgysy salnan gutynyň oklanmagy we ilkinji beton garyndysynyň guýulmagy bilen tamamlandy.
Soňra bu şanly waka mynasybetli toý sadakasy berildi.
