Häzirki wagtda dünýäniň iň garry gorillasy hasaplanýan Fatu Berlin haýwanat bagynda özüniň 69 ýaşyny baýram etdi.
Şanly sene mynasybetli jandara dürli gök önümlerden — çerri pomidoryndan, şugundyrdan, poreý soganyndan we salat ýapraklaryndan ybarat bolan täsin «tort» hödürlenildi. Haýwanat bagynyň işgärleri garry primatlaryň saglygyna zyýanlydygy sebäpli, gorilla süýji tagamly tort iýdirmekden ýüz dönderdiler.
Fatu günbatar düzlük gorillasy bolup, 1959-njy ýyldan bäri Berlinde ýaşaýar. Şol wagtlar jandaryň takmynan iki ýaşynda bolandygy çaklanylýar.
Onuň takyk doglan senesiniň belli bolmandygy üçin, 13-nji apreli resmi doglan güni hökmünde kabul etmek kararyna gelindi.
Ýabany tebigatda gorillalar, köplenç 35–40 ýyl ýaşaýarlar, gabawda bolsa olaryň ömri has uzyn bolýar.
Fatu 2024-nji ýylda 75 ýaşyndan aşan Ingo atly flamingo aradan çykandan soň, haýwanat bagynyň iň garry ýaşaýjysy derejesine eýe boldy. Ginnesiň rekordlar kitabynyň maglumatyna görä, Fatu Günbatar Afrikada doglan bolmaly. Ony ilki fransuz deňizçisi alyp gaýdypdyr, soňra bolsa haýwanat bagyna satylypdyr.
Häzirki wagtda Fatu beýleki gorillalardan aýratyn saklanýar. Ýaşy bilen baglylykda, onda käbir saglyk meseleleri — dişleriniň düşmegi, artrit we eşidişiniň peselmegi ýaly ýagdaýlar bar. Haýwanat bagynyň primatlar bölüminiň ýolbaşçysy Kristian Aust jandaryň keçjal häsiýetlidigine garamazdan, idegçileri bilen gowy gatnaşykdadygyny aýdýar.
