Çehiýada altyn teňňelerden we gymmat bahaly şaý-seplerden ybarat hazynany tapan iki syýahatçy, takmynan 11,7 million kron (563 müň dollara golaý) möçberinde pul sylagyny alar. Bu barada Radio Prague habar berýär.
Täsin tapyndy ýurduň demirgazyk-gündogaryndaky Podkrkonoşi daglyk sebitinde gezelenç wagtynda ýüze çykaryldy. Gymmatlyklaryň umumy agramy 7 kilograma golaýdyr. Syýahatçylar hazynany tapan dessine ony döwlet muzeýine gowşurdylar. Ýurduň medeni mirasy goramak baradaky kanunçylygyna laýyklykda, olara tapyldynyň bahasynyň belli bir bölegi sylag hökmünde tölener.
Hazynanyň düzüminde 598 sany, agramly bölegi ýokary probaly altyndan ýasalan teňňeler, 30-dan gowrak gymmat bahaly täsin şaý-sepler we temmäki gutulary bar.
Hünärmenleriň geçiren ilkinji barlaglaryna görä, teňňeleriň köpüsi Fransiýada zikgelenipdir. Şeýle-de hazynanyň içinde Awstro-Wengriýa, Belgiýa we Osman imperiýasyna degişli nusgalar hem bar. Bu bolsa hazynanyň dürli wagtlarda birnäçe ýurtlardan ýygnalandygyny görkezýär.
Häzirki wagtda arheologlar we taryhçylar bu hazynanyň daglyk sebite nähili ýagdaýda düşendigini öwrenýärler.
