Aşgabatda Türkmenistanyň Ylymlar akademiýasynyň Halkara ylmy-tehnologiýa parkynda ÝUNESKO-nyň «Sanly ylym» kafedrasy açyldy.
THP-niň habar bermegine görä, açylyş dabarasynyň çäklerinde ýaş alymlaryň işlerine, ykdysadyýeti sanlylaşdyrmak taslamalaryna we arheologik tapyndylara bagyşlanan sergi geçirildi.
Täze kafedra ÝUNESKO-nyň 130 ýurtda 1100-den gowrak kafedrany birleşdirýän UNITWIN ulgamyna girdi. Bu Türkmenistanda şeýle görnüşli üçünji merkezdir. Mundan ozal Magtymguly adyndaky Türkmen döwlet uniwersitetinde we Seýitnazar Seýdi adyndaky Türkmen döwlet mugallymçylyk institutynda şeýle kafedralar döredilipdi.
Kafedranyň esasy wezipesi — döwrebap tehnologiýalary ykdysadyýetde ulanmaga we ylmy barlaglary geçirmäge ukyply hünärmenleri taýýarlamakdan ybarat.
Ileri tutulýan ugurlaryň hatarynda emeli aň, uly maglumatlaryň seljermesi, geogiňişlik ulgamlary we agrosenagat toplumy hem-de serişdeleri dolandyrmak üçin hemra gözegçiligi ýaly ugurlar bar.
Kafedranyň işiniň çäklerinde Russiýanyň, Belarusyň, Türkiýäniň we Eýranyň ylmy merkezleri bilen hyzmatdaşlygyň eýýäm ýola goýlandygy habar berilýär.
Birinji mejlisiň dowamynda Geografik maglumatlar ulgamy barlaghanasynyň uly ylmy işgäri Nikolaý Nikolaýew täze kafedranyň ýolbaşçysy wezipesine bellenildi.
Çärä gatnaşyjylar tehnologiýalar merkeziniň tehniki binýadynyň halkara barlaglaryny we ylmy hyzmatdaşlygy giňeltmäge mümkinçilik berjekdigini belledi.
