Gazagystanyň Prezidenti Kasym-Žomart Tokaýew «Hoja Ahmet Ýasawy» (Қожа Ахмет Ясауи) atly täze döwlet ordenini döretmek baradaky Permana gol çekdi. Bu sylag türki dünýäsiniň beýik akyldary, sufizmiň türki şahasynyň düýbüni tutujy şahyryň adyny göterýär.
Täze orden Gazagystanyň raýatlaryna we daşary ýurtlylara Hoja Ahmet Ýasawynyň mirasyny saklamakda, öwrenmekde we wagyz etmekde bitiren aýratyn hyzmatlary, şeýle-de medeni-ruhy gymmatlyklary berkitmekdäki goşantlary üçin gowşurylar. Ordeniň dizaýnyny taýýarlamak Gazagystanyň Milli bankyna tabşyryldy.
Hoja Ahmet Ýasawy (1103–1166) görnükli sufist şahyr, «Diwany hikmet» («Hikmetler kitaby») atly meşhur eseriň awtorydyr. Ol Merkezi Aziýanyň türki halklarynyň arasynda yslamyň we ynsanperwerlik taglymlarynyň ýaýramagynda ähmiýetli orun eýelän taryhy şahsyýetdir.
Häzirki wagtda Gazagystanyň Türküstan şäherinde Emir Teýmir (Teýmirleň) tarapyndan gurlan Ýasawynyň kümmeti ýerleşýär. Täze döredilen döwlet sylagy Türküstanyň türki dünýäsiniň ruhy merkezi hökmündäki ornuny has-da berkitmäge we beýik akyldaryň pelsepesini dünýä ýaýmaga hyzmat eder.
