Habar berşimiz ýaly, Aşgabatda «Turkmentravel – 2026» atly halkara syýahatçylyk sergisi we maslahaty öz işine başlady. Bu çäre türkmen we daşary ýurtly syýahatçylyk pudagynyň wekilleriniň arasynda göni işewürlik gatnaşyklaryny ýola goýmak üçin netijeli meýdança öwrüldi.
Maslahatyň çäklerinde dürli ýurtlardan, takmynan, 70 sany kompaniýa, şol sanda Türkiýäniň, BAE-niň we Russiýanyň awiakompaniýalary sanly dolandyryş ulgamlaryny ornaşdyrmak, Beýik Ýüpek ýolunyň ugrundaky syýahatçylyk ugurlaryny giňeltmek we pudaga maýa goýumlary çekmek meselelerini ara alyp maslahatlaşýar.
Söwda-senagat edarasynda dowam edýän sergi Türkmenistanyň 300-e golaý syýahatçylyk kärhanasynyň mümkinçiliklerini görkezýär.
ÝUNESKO-nyň Bütindünýä mirasynyň sanawyna girizilen taryhy-medeni ýadygärliklere (Gadymy Merw, Köneürgenç, Nusaý), şeýle hem Köpetdagyň daglaryndaky we Garagum sährasyndaky ekosyýahatçylyk mümkinçiliklerine bagyşlanan diwarlyklar myhmanlaryň aýratyn ünsüni çekýär.
Forumyň gatnaşyjylary sebitde ilkinji «akylly şäher» bolan we halkara syýahatçylyk ugurlaryna işjeň goşulýan Arkadag şäheriniň uly meşhurlyga eýedigini nygtaýar.
Hünärmenler Aşgabat şäheriniň Syýahatçylyk şäherleriniň bütindünýä federasiýasynyň agzalygyna kabul edilmegi hem-de Mary, Türkmenabat şäherleriniň we «Awaza» milli syýahatçylyk zolagynyň hem goşulmagy ugrunda degişli işleri geçirmek barada pikir alyşdy.
Forumyň maksatnamasy hususy syýahatçylyk kompaniýalarynyň arasynda hyzmatdaşlyk baradaky resminamalar toplumyna gol çekilmegini we halkara bilermenler tarapyndan okuw maslahatlarynyň geçirilmegini öz içine alýar.
