13-nji aprelde Aşgabatda Türkmenistanyň kiçi we orta telekeçiliginiň wekilleri üçin eksport taýýarlygyny ýokarlandyrmaga hem-de ýerli dokma öndürijilerini Ýewropa Bileleşiginiň bazaryna goşmaga bagyşlanan okuw maslahaty geçirildi. Bu çäre ÝB tarapyndan maliýeleşdirilýän «Türkmenistan: söwdanyň durnuklylygy we integrasiýa» taslamasynyň çäklerinde Halkara söwda merkezi tarapyndan guraldy.
Okuw maslahatyna tikinçilik we dokma önümçiligi bilen meşgullanýan hususy pudagyň 29 wekili gatnaşdy. Gatnaşyjylar ÝB bazarynyň häzirki tendensiýalary, şahadatnamalaşdyryş talaplary we «European Green Deal» taslamasynyň çäklerinde durnukly önümçilik standartlary bilen tanyşdy. Ýewropaly satyn alyjylaryň isleglerine we halkara arenasyndaky bäsdeşlik ukybynyň şertlerine aýratyn üns berildi.
Amaly sapaklaryň dowamynda telekeçiler «Bahar-Tomus 2027» möwsüminiň kolleksiýalaryny taýýarlamagyň usullaryny, assortimenti meýilnamalaşdyrmak meselelerini we dizaýnyň maksatly auditoriýanyň isleglerine uýgunlaşdyrylmagyny öwrendi. Okuwyň dowamynda brendleriň ornuny berkitmäge, wizual merçandaýzinge we daşary ýurtly sarp edijiler üçin brendiň taryhyny döretmäge hem üns berildi.
Şeýle hem bilermenler halkara pudaklaýyn sergilere, hususan-da Pariždäki «Who’s Next» sergisine netijeli taýýarlyk görmek boýunça maslahatlary berdi. Gatnaşyjylar bazardaky ornuny güýçlendirmek we mümkin bolan hyzmatdaşlar bilen göni aragatnaşyklary ýola goýmak barada anyk maslahatlary aldy.
Bu taslama işewürlik gurşawyny gowulandyrmak hem-de kiçi we orta telekeçiligiň dünýä bazarlaryndaky bäsdeşlik ukybyny ýokarlandyrmak arkaly Türkmenistanyň ykdysady ösüşine ýardam bermäge gönükdirilendir.
