Selin Dionyň sentýabr we oktýabr aýlarynda Parižde geçirjek 16 konsertden ybarat bolan täze döredijilik sapary şäheriň syýahatçylyk pudagyna güýçli ykdysady itergi berer diýlip garaşylýar. Ekspertleriň baha bermegine görä, aýdymçynyň sahna dolanmagy sebitiň ykdysadyýetine 300-den 500 mln ýewro çenli girdeji getirip biler.
Choose Paris Region agentliginiň başlygy Aleksandra Dýublanş bu möçbere petek satuwynyň, myhmanhana we restoran bronlamalarynyň hem-de söwda harajatlarynyň girýändigini belleýär. Sebäbi şeýle ýagdaýlarda daşary ýurtly myhmanlar ýerli ýaşaýjylara garanyňda has köp pul sarp etmäge taýýar bolýarlar.
Adagio myhmanhanalar ulgamy bronlamalaryň 400% artandygyny hasaba aldy, Booking.com bolsa «Paris» diýen gözleg sanynyň 49% ýokarlanandygyny habar berdi. MKG analitigi Wangelis Panaýotis, eger-de goldaw toparynyň we janköýerleriň ulag hem-de logistika çykdajylary hasaba alynsa, umumy ykdysady täsiriň 1,2 mlrd ýewro ýetip biljekdigini güman edýär.
58 ýaşly Selin Dion seýrek duş gelýän autoimmun keseli zerarly karýerasyna alty ýyllyk arakesme bermeli bolupdy.
– Şu ýyl men ömrümde iň gowy doglan gün sowgadyny alýaryn. Mende sizi görmäge we Parižde ýene-de sahna çykmaga mümkinçilik dörär – diýip, aýdymçy begenjini paýlaşýar.
Turnir 12-nji sentýabrdan 17-nji oktýabra çenli dowam eder we konsert bahanaly syýahat etmegi aňladýan döwrüň täze trendi – «gig-tripping-iň» bir bölegi bolar.
