Aşgabatda «Turkmentravel – 2026» atly halkara syýahatçylyk sergisi we maslahaty öz işine başlady. Türkmenistanyň Prezidenti Serdar Berdimuhamedow forumyň gatnaşyjylaryna gutlag hatyny ýollady.
«Sizi Aşgabat şäherinde geçirilýän «Turkmentravel — 2026» atly halkara syýahatçylyk sergisiniň we maslahatyň dabaraly açylmagy mynasybetli tüýs ýürekden gutlaýaryn. «Garaşsyz, baky Bitarap Türkmenistan — bedew batly at-myradyň mekany» ýylynda guralýan bu halkara forumyň syýahatçylyk pudagynda möhüm ähmiýetli waka öwrüljekdigine berk ynanýaryn» – diýlip, resmi metbugatda çap edilen gutlagda bellenilýär.
Prezident syýahatçylygy we halkara hyzmatdaşlygy ösdürmegiň ýurduň ileri tutulýan ugurlarynyň biri bolup galýandygyny nygtady.
«Sergä ýurdumyzyň we dünýä döwletleriniň syýahatçylyk kärhanalarynyň gatnaşmagy özara tejribe alyşmaga, birek-biregi alnyp barylýan işler, täze taslamalar bilen ýakyndan tanyşdyrmaga uly ýardam berer. Halkara maslahatyň dowamynda geçiriljek iş duşuşyklary, okuw we ylmy-amaly maslahatlar, syýahatçylyk gezelençleri bu çäreleriň ähmiýetini has-da artdyrar» – diýip, döwlet Baştutany belledi.
Prezidentiň aýtmagyna görä, ýurtda baý halkara tejribesini hasaba almak bilen, milli syýahatçylyk pudagy kemala geldi we onuň hukuk, ykdysady hem-de durmuş esaslary döwrebaplaşdyryldy. Bu ugurda halkara sergileriň we maslahatlaryň yzygiderli geçirilmegi pudagy kämilleşdirmekde hem-de ugurdaş düzümler bilen gatnaşyklary ösdürmekde uly ähmiýete eýedir.
«Şeýle halkara sergileriň we maslahatlaryň geçirilmegi Garaşsyz ýurdumyzyň taryhy-medeni, tebigy ýadygärliklerini, gözel ýerlerini mahabatlandyrmakda hem-de olara daşary ýurtly syýahatçylary çekmekde möhüm ähmiýete eýedir» – diýip, Prezident gutlagynyň ahyrynda gatnaşyjylara berk jan saglyk we syýahatçylyk pudagyny ösdürmek ugrundaky işlerinde uly üstünlikleri arzuw etdi.
