Türkmenistanyň Halk Maslahatynyň Başlygy Gurbanguly Berdimuhamedow Awstriýa amala aşyran saparynyň dowamynda UNIDO-nyň Baş direktory Gerd Müller bilen duşuşdy diýip, TDH agentligi habar berýär.
Gepleşikleriň esasy mowzugy durnukly senagat ösüşi ugrundaky hyzmatdaşlygy berkitmekden, şol sanda Arkadag «akylly» şäherini gurmagyň ikinji tapgyryny amala aşyrmakdan we milli ykdysadyýete innowasion çözgütleri ornaşdyrmakdan ybarat boldy.
Gurbanguly Berdimuhamedow Türkmenistanyň «ýaşyl» senagat geçişi we howanyň üýtgemegine garşy hereketler boýunça 2026–2030-njy ýyllar üçin UNIDO bilen hyzmatdaşlygyň Ýol kartasyny işläp düzmek we durmuşa geçirmek mümkinçiligine seretmäge taýýardygyny tassyklady.
Duşuşykda haly we dokma senagatyndaky taslamalar, şeýle hem Arkadag şäherinde lukmançylyk klasterini döretmek meseleleri maslahatlaşyldy.
UNIDO-nyň ýolbaşçysy Türkmenistanyň energetika diplomatiýasyny ösdürmäge goşan goşandyna we energetika howpsuzlygy boýunça BMG-niň başlangyçlaryny goldamagyna ýokary baha berdi.
Duşuşygyň dowamynda Gurbanguly Berdimuhamedow sebit başlangyçlaryna, şol sanda Merkezi Aziýada howanyň üýtgemegi bilen baglanyşykly tehnologiýalar boýunça BMG-niň sebit merkezini döretmek meselesine aýratyn ünsi çekdi.
Taraplar şeýle hem serhetüsti suw serişdelerini dolandyrmak we Hazar ekologiýa başlangyjyny öňe sürmek meseleleri boýunça pikir alyşdy.
