Iýun aýyndan başlap, Günorta Koreýada mobil internetine ählumumy mugt elýeterlilik girizilýär diýip, ýurduň Ylym ministrligine salgylanyp, «The Register» neşiri habar berýär.
Esasy internet bukjasy gutarandan soň, 7 milliondan gowrak abonent hiç hili çäklendirmesiz, 400 Kbit/sek tizlikde internet torundan peýdalanyp biler.
Ylym ministri Pe Kýon Hun onlaýn hyzmatlara elýeterliligiň esasy zerurlyga öwrülendigini mälim etdi.
Bu maksatnama ýurduň iň iri operatorlary bolan SK Telecom, KT we LG Uplus goşuldy. Şeýle çäre, şol bir wagtda, birnäçe dawalardan soňra kompaniýalaryň abraýyny dikeltmäge hem gönükdirilendir. Ýakynda SK Telecom kompaniýasynda goraglylygyň pesligi sebäpli maglumatlar uly möçberde syzypdy, LG Uplus kompaniýasynyň bolsa 3 terabaýtlyk maglumaty darknete düşdi. KT kompaniýasy bolsa ulgamdaky gowşaklyklar we zyýanly programma üpjünçiliginiň ýaýramak ähtimallygy sebäpli tankyt edildi.
Mugt internetden başga-da, telekommunikasiýa kompaniýalary bahasy 20 müň wona ($13,5) çenli bolan arzan 5G nyrhnamalaryny işe girizer, garry adamlar üçin hyzmatlar bukjasyny köpelder we jemgyýetçilik ulaglaryndaky Wi-Fi ulgamyny döwrebaplaşdyrar. Muňa jogap hökmünde bolsa, hökümet emeli aň (EA) hyzmatlary üçin niýetlenen torlar ulgamyndaky ylmy-barlag işlerine goldaw berer.
