Awstriýa amala aşyran saparynyň çäklerinde Türkmenistanyň Halk Maslahatynyň Başlygy Gurbanguly Berdimuhamedow BMG-niň Baş sekretarynyň orunbasary hanym Rabab Fatima bilen duşuşyk geçirdi.
TDH-niň habar bermegine görä, taraplar Türkmenistanyň oňyn bitaraplyk syýasatynyň ählumumy durnuklylygy üpjün etmekdäki ornuny hem-de Energetika we howa boýunça halkara Wena forumynda öňe sürlen başlangyçlary durmuşa geçirmegiň meselelerini maslahatlaşdy.
Rabab Fatima BMG-niň Baş sekretary Antoniu Guterrişiň salamyny ýetirdi we Türkmenistanyň teklipleriniň Guramanyň Durnukly ösüş maksatlaryna ýetmek boýunça wezipeler bilen ýakyndan baglanyşyklydygyny belledi.
Gurbanguly Berdimuhamedow Türkmenistanyň BMG we onuň ýöriteleşdirilen edaralary bilen hyzmatdaşlygy yzygiderli ösdürýändigini nygtady.
Duşuşygyň ahyrynda taraplaryň özara bähbitli gepleşikleri mundan beýläk-de giňeltmäge taýýardyklary tassyklanyldy.
