Türkmenistanyň Halk Maslahatynyň Başlygy Gurbanguly Berdimuhamedow Awstriýa amala aşyran saparynyň dowamynda Energetika we howa boýunça halkara Wena forumyna gatnaşdy. Bu barada «TDH» habar berýär.
Hofburg köşgünde geçirilen bu wekilçilikli ýygnanyşygyň üns merkezinde energetika geçişini çaltlandyrmak, «ýaşyl» wodorody ornaşdyrmak we senagatda uglerod zyňyndylaryny peseltmek meseleleri boldy.
Forumda çykyş edip, Gurbanguly Berdimuhamedow Türkmenistanyň halkara bileleşiginiň işjeň agzasy hökmünde, energetika durnuklylygy ulgamynda BMG-niň strategiýalarynyň amala aşyrylmagyna öz goşandyny goşýandygyny nygtady.
Ýurduň 2030-njy ýyla çenli metan zyňyndylaryny 30% peseltmek boýunça ulgamlaýyn işleri alyp barýandygy we gaýtadan dikeldilýän energiýa çeşmelerini ösdürýändigi bellenildi. Balkan welaýatynda gurulýan 10 MWt kuwwatly utgaşykly Gün we ýel elektrik stansiýasy munuň aýdyň mysaly hökmünde görkezildi.
Türkmen halkynyň Milli Lideri Aşgabadyň howanyň üýtgemegi boýunça Pariž ylalaşygynyň maksatlaryna ýetmekdäki üýtgewsiz ygrarlylygyny tassyklady. Ol şeýle hem Aşgabatda Merkezi Aziýada howanyň üýtgemegi bilen bagly tehnologiýalar boýunça BMG-niň sebit merkeziniň işläp başlajakdygyny mälim etdi.
Awstriýa bolan saparyny tamamlap, Türkmenistanyň Halk Maslahatynyň Başlygy Aşgabada ugrady.
