Türkmenistan Ýakyn Gündogardaky gapma-garşylyklaryň dowamynda Hazar sebitiniň çäklerine harby zarbalaryň urulmagyna çuňňur alada bildirýär we bu zolakda islendik harby hereketleriň alnyp barylmagyny asla ýol berilmesiz hasaplaýar. Ýakyn Gündogardaky ýagdaýlar boýunça ýurduň resmi garaýşyny Türkmenistanyň Halk Maslahatynyň Başlygy Gurbanguly Berdimuhamedow ýerli köpçülikleýin habar beriş serişdeleriniň wekillerine beren interwýusynda beýan etdi.
Žurnalistler bilen söhbetdeşlik Awstriýa amala aşyrylan saparyň çäklerinde boldy diýip, «Watan» habarlar gepleşiginde habar berildi.
Türkmen halkynyň Milli Lideri otuz ýyldan gowrak wagtyň dowamynda Türkmenistanyň Azerbaýjan, Gazagystan, Eýran we Russiýa bilen bilelikde Hazar hyzmatdaşlygyny yzygiderli ýola goýandygyny nygtady. 2018-nji ýylda gol çekilen Hazar deňziniň hukuk ýagdaýy hakynda Konwensiýa sebit howpsuzlygynyň esas goýujy bölegidir. Bu resminamada Hazar deňziniň parahatçylyk, ylalaşyk we hoşniýetli goňşuçylyk giňişligidigi, bu ýerde hazarýaka ýurtlaryndan beýleki döwletleriň harby güýçlerini ýerleşdirmegiň ýa-da islendik harby işjeňliginiň gadagandygy takyk görkezilendir.
«Şoňa görä-de, serhetdeş hazarýaka döwletiniň çäklerine harby zarbalaryň urulmagyna Türkmenistanyň biynjalyk bolmagy tebigydyr. Biziň ýurdumyz şeýle hereketleri doly ret edýär. Hazar sebitinde harby hereketler düýbünden ýol berilmesizdir» – diýip, Halk Maslahatynyň Başlygy belledi.
Şunuň bilen baglylykda, Türkmenistan ýakynda teklip edilen Hazarýaka döwletleriniň Bilelikdäki beýannamasynyň taslamasyny dykgatly öwrenenden soň, ony goldamak barada karara geler. Bu taslamada Ýakyn Gündogardaky harby gapma-garşylygyň Hazar sebitine ýaýramagynyň onuň güýçlenmegini aňladýandygy we sebit howpsuzlygyna howp salýandygy bellenilýär. Bu resminama gapma-garşylygyň geriminiň giňemeginiň kabul edilmesizdigi barada ýurduň düýpli garaýyşlaryny beýan edýär.
