Türkmenistanyň Halk Maslahatynyň Başlygy Gurbanguly Berdimuhamedowyň Awstriýa Respublikasyna saparynyň çäklerinde ýurdumyzyň köpçülikleýin habar beriş serişdeleriniň wekilleri bilen söhbetdeşlik geçirdi.
Söhbetdeşlikde sebitdäki ýagdaýlar bilen bagly: "Häzirki emele gelen ýagdaýyň ösüşi Türkmenistany örän ynjalykdan gaçyrýar. Bu ýagdaýyň bizi howsala salmagy ýönelige däl. Sebäbi, giň çäkleri öz içine alýan Ýakyn Gündogar sebiti geografiýa taýdan Türkmenistana hem galtaşýar. Şoňa görä-de, şol ýerdäki ýagdaýlar goňşy ýurtlara we tutuş sebite ýaramaz täsirini ýetirip biler" diýip bellän Halk Maslahatynyň Başlygy Türkmenistan gapma-garşylykly ýagdaýlary we dawalary parahatçylykly, syýasy-diplomatik serişdeler arkaly çözmäge esaslanýandygyny nygtady.
"Men hünärim boýunça onlarça ýyllary döwlet gullugynda häzirki we geljekki nesilleriň saglygyny hem-de ömrüni gorap saklamaga bagyşlan, lukman hökmünde köpçülikleýin gyryş ýaraglarynyň düzedip bolmajak ýaramaz netijelere getirjekdigini belläsim gelýär. Onuň ulanylan ýagdaýynda ilata, ekologiýa, iri sebitleriň durmuş, ykdysady ösüşiniň ähli ugurlaryna agyr täsir etjekdigini bilýärin" diýip Gurbanguly Berdimuhamedow aýtdy. Şeýle-de munuň düýpli we ýokary derejede jogapkärçiligi talap edýän meseledigine we muňa kembaha, ýüzleý we oýlanyşyksyz garamak ýol berilmesiz örän howply ýagdaýdygyna ünsi çekdi.
