Birleşen Arap Emirliklerinde semizlige garşy dünýäde ilkinji gerdejik görnüşindäki dermanyň ulanylmagy makullandy. Bu barada «Khaleej Times» neşiri habar berýär.
Gürrüň «Foundayo» (orforglipron) derman serişdesi barada barýar, ol 2026-njy ýylyň maý aýynda dermanhanalara gelip gowşar. BAE bu dermanyň satylmagyna rugsat beren ABŞ-dan soň ikinji ýurt boldy.
Häzirki wagtda bar bolan sanjym görnüşindäki dermanlardan tapawutlylykda, bu derman serişdesi içilýän bolup, aşgazanda dargamaýar.
Saglygy goraýyş ministrliginiň wekili Fatima Al Kaabiniň aýtmagyna görä, «gerdejik görnüşleriniň ulanylmagy diňe bir amatlylyk meselesi bolman, eýsem ozal sanjymdan ýüz öwren ilat gatlaklaryny bejergi bilen gurşap almaga mümkinçilik berýän strategik öňegidişlikdir».
Derman aşgazan-içege ýolunyň işini düzgünleşdirýär we dokluk duýgusyny döredýär, bu bolsa agramy azaltmaga hem-de gandaky şekeriň derejesini gözegçilikde saklamaga ýardam berýär.
Derman hassanyň ýagdaýyna baha berleninden soň, diňe lukman haty boýunça berler.
