Alymlar taryhda ilkinji gezek ummanyň çuňluklarynda sunaminiň nähili döreýändiginiň takyk we iki ölçegli (2D) suratyny alyp bildiler. Euronews neşiriniň habar bermegine görä, bu täsin suratlar SWOT emeli hemrasy arkaly alyndy.
Ignasio Sepulwedanyň ýolbaşçylygyndaky barlag topary geçen ýylyň iýul aýynda Kamçatkadaky 8,8 ballyk ýer titremesinden 70 minut soňra alnan maglumatlary seljerdiler. Şonda emeli hemra äpet tolkun bilen birlikde, şol tolkunyň yzyndan gelýän we betbagtçylygyň gözbaşy barada örän möhüm maglumatlary berýän «ownuk tolkunlar zynjyryny» hem anyklady.
Öňler sunami baradaky maglumatlar diňe deňziň düýbündäki basyşy ölçeýän sensorlara (DART buýlaryna) bil baglaýardy. Emma basyş ölçegleri olara diňe belli bir nokatlarda maglumat berýärdi we tolkunyň tutuş gurluşyny görmäge mümkinçilik bolmaýardy.
Täze SWOT usuly bolsa umman üstüniň gaty giň we aýdyň suratyny çekýär. Ol tolkunlaryň ugruny, olaryň aralygyny we egriligini santimetrlerde ölçäp görkezýär.
Özi-de bu täze açyş sunaminiň dörän ýerini 10 kilometr takyklyk bilen kesgitlemäge şert döretdi. Şeýle etmek ozal asla mümkin däldi. Indi bolsa, matematik hasaplamalar we emeli hemranyň maglumatlaryny birleşdirip, sunaminiň haçan we nähili beýiklikde kenara urjakdygyny öňünden ygtybarly çaklap bolar.
Netijede bu tehnologiýa geljekde adamlary öz wagtynda ewakuasiýa etmäge we müňlerçe ömrüň halas bolmagyna uly ýardam berer.
