10-njy aprelde Lebap welaýatynda geçirilen Ministrler Kabinetiniň göçme mejlisinde Prezident Serdar Berdimuhamedow beýleki meseleler bilen bir hatarda, bu sebitiň durmuş-ykdysady ösüşiniň meselelerine hem garady.
Döwlet Baştutanynyň Buýrugyna laýyklykda, şu ýyl Lebapda 8 sany binanyň we desganyň açylmagy meýilleşdirilýär. Olaryň gurluşygy bellenilen möhletlerde ulanmaga bermek maksady bilen ýokary depginde alnyp barylýar.
Senagat we gurluşyk serişdeleri
Döwletli etrabynyň Dostluk şäherinde bilelikdäki «Türkmengips» hojalyk jemgyýetiniň zawodynyň gurluşygy dowam edýär. Kärhana ýylda 250 müň tonna gury gurluşyk garyndylaryny we 20 million inedördül metr gipsokarton öndürer.
Şeýle hem Lebap welaýatynyň Köýtendag etrabynda ýerleşýän Garlyk kaliý dag-magdan toplumyny taslama kuwwatyna çykarmak boýunça işler alnyp barylýar.
Energetika we ýol infrastrukturasy
Sebiti ygtybarly energiýa bilen üpjün etmek üçin täze elektrik beketleriniň we elektrik geçirijileriň gurluşygy dowam edýär.
Munuň bilen bir wagtyň özünde, ýol gulluklary döwlet we ýerli ähmiýetli ýollaryň, köprüleriň, şeýle hem sebitiň oba-şäherlerindäki köçeleriň we ýanýodalarynyň meýilleşdirilen abatlaýyş işlerini amala aşyrýar.
Himiýa pudagy
«Türkmenhimiýa» döwlet konserni S.A.Nyýazow adyndaky Türkmenabat himiýa zawodyny giňeltmek işlerini dowam etdirýär. Bu ýerde ýylda 350 müň tonna superfosfat we 100 müň tonna ammoniý sulfatyny öndürjek toplum gurulýar. Bu bolsa ekerançylary zerur dökünler bilen üpjün eder.
Prezident Serdar Berdimuhamedow hasabaty jemläp, desgalaryň hilini we ulanmaga berilmeli möhletlerini berk gözegçilikde saklamagy, şeýle hem sebitiň önümçiliklerini we ýol ulgamyny döwrebaplaşdyrmagy dowam etdirmegi tabşyrdy.
