Şu gün Türkmenistanyň Prezidenti Serdar Berdimuhamedow dabaraly ýagdaýda Aşgabat – Türkmenabat ýokary tizlikli awtomobil ýolunyň üçünji tapgyryny açdy. Ýoluň umumy uzynlygy 600 kilometre deň diýip, «Neýtralnyý Turkmenistan» gazeti habar berýär.
Ulanmaga berlen Mary – Türkmenabat bölegi awtobanyň jemleýji bölegi bolup, onuň gurluşygynyň tamamlanmagy ýükleriň we ýolagçylaryň gatnawyny çaltlandyrmaga mümkinçilik berer.
Ýoluň ugrunda kafe, awtoýangyç beketleri, duralgalar, tehniki hyzmat ediş nokatlary we beýleki desgalar ýerleşdirildi. Şeýle hem ýoluň ugrunda haýwanlaryň ýola çykmagynyň öňüni alýan gorag torlary gurnaldy. Olaryň howpsuz geçmegi üçin ýörite ýerasty geçelgeler göz öňünde tutuldy.
Ýoluň hereketli böleginiň ini 34,5 metre deň bolup, awtoulaglar her tarapa üç zolak boýunça hereket edip biler.
Awtobanyň ulanmaga berilmegi ýurduň ulag-logistika ulgamyny ösdürmek we onuň üstaşyr mümkinçiliklerini berkitmek üçin möhüm ädim boldy. Taslama Beýik Ýüpek ýolunyň taryhy ugruny döwrebap görnüşde täzeden dikeltmegiň çäklerinde durmuşa geçirildi.
