2026-njy ýylyň 7-nji aprelinde Türkmenistanyň Yslamabatdaky Ilçihanasynda Pakistanyň Lahor söwda-senagat edarasynyň wekiliýeti bilen duşuşyk geçirildi. Şahid Haliliň ýolbaşçylygyndaky wekiller iki ýurduň işewürlik jemgyýetleriniň arasyndaky gatnaşyklary giňeltmäge we Ilçihana bilen hyzmatdaşlygy berkitmäge uly gyzyklanma bildirdi diýip, Türkmenistanyň DIM-i habar berýär.
Türkmen tarapy duşuşygyň dowamynda ýurtda daşary söwdany ösdürmek we dünýä ykdysadyýetine işjeň gatnaşmak ugrunda amala aşyrylýan ykdysady özgertmeler barada giňişleýin maglumat berdi.
Şeýle hem pakistanly myhmanlara Türkmenistanyň ägirt uly tebigy gaz gorlary, nebit önümleri, dokma we oba hojalyk harytlarynyň eksport mümkinçilikleri tanyşdyryldy. Söhbetdeşligiň barşynda şu ýylyň dowamynda geçiriljek we dünýäniň dürli künjeklerinden telekeçileri bir ýere jemlejek halkara işewürlik forumlaryna aýratyn üns çekildi.
Duşuşygyň ahyrynda taraplar özara bähbitli söwda ýollaryny tapmak we ykdysady hyzmatdaşlygy pugtalandyrmak maksady bilen, geljekde guraljak bilelikdäki forumlara we sergilere işjeň gatnaşmaga ygrarlydyklaryny tassyklady.
