IQ derejesi ýokary bolan adamlar köplenç özlerini jemgyýetden çetde ýaly duýýarlar we güýçli utanç duýgusyny başyndan geçirýärler. Bu bolsa olaryň adamlara öwrenişmegini kynlaşdyrýar diýip, Your Tango neşiri habar berýär. Akylly bolmak üstünligiň açary hasaplansa-da, köp zehinli adamlar üçin bu ýagdaý öz-özüne aşa talapkär bolmaga we ýalňyzlyga alyp barýar.
Hünärmen Dana Dosuelliň aýtmagyna görä, şeýle adamlar köp kişiden akyllydyklaryny bilseler-de, içinden özlerini «nädogry» hasaplaýarlar. Hut şunuň özi-de, olaryň dünýä bilen gyzykman, ýalňyz galmagyna bahana bolýar.
Psihoterapewt Imi Lo zehinli adamlaryň köplenç hakyky häsiýetlerini gizleýändigini aýdýar. Sebäbi daş-töwerekdäki adamlar barybir olaryň dünýäsine düşünmeýärler. Netijede, olar özlerini «aldawçy» ýaly duýup başlaýarlar.
Akyl derejesi ýöntem adamlardan tapawutlylykda, zehinli adamlar utanjy has agyr we çylşyrymly kabul edýärler. Ine, bu-da, olaryň adamlardan daşlaşmagyna alyp barýan ýene bir sebäpdir.
Synçylar olaryň bu kynçylygy ýeňmegi üçin özlerini nähili duýýandyklary hakda gürleşmegiň zerurdygyny aýdýarlar. Çünki şeýtmek bilen, olar özleri barada gowy pikir etmegi we içindäki «tankytça» düşünmegi başaryp bilerler.
Iň esasy-da, içki gorkyny we utanjy ýüze çykaryp, olaryň nireden gelýändigini seljermek hökmandyr. Bu olara özlerini boluşlary ýaly kabul etmäge kömek eder.
Gysgaça aýdylanda, utanç – adamy jemgyýetden daşlaşdyrýan iň agyr duýgularyň biridir. Şeýle-de bolsa, zehinli adamlar öz-özlerini kabul edip, duýgularyny açyk paýlaşsalar, jemgyýet bilen täzeden baglanyşyk gurup bilerler.
