Mary welaýatynyň Ýolöten etrabynyň Ymambaba geňeşliginiň çäginde 800 gektar meýdany eýelejek täze, döwrebap obanyň gurluşygyna dabaraly ýagdaýda badalga berildi. Bu barada «Neýtralnyý Turkmenistan» gazeti habar berýär.
Taslama laýyklykda, bu ýerde 22 müň 500 ýaşaýjy üçin niýetlenen 4500 sany ýaşaýyş jaýy gurlar. Öýleriň 2490 sanysy bäş otagly, 2010 sanysy bolsa üç otagly jaýlardan ybarat bolup, olar oba durmuşynyň aýratynlyklary bilen şäher amatlyklaryny özünde jemlär.
Täze şäherçäniň düzüminde döwrebap infrastruktura desgalarynyň toplumy, şol sanda Geňeşligiň binasy, 500 orunlyk Medeniýet öýi, 1000 orunlyk metjit, mekdep, saglyk merkezi, hassahana we uly söwda merkezi ýerleşer. Şeýle hem ýaşaýjylary arassa agyz suwy bilen üpjün etmek üçin kuwwaty 15 000 kub metr bolan suw arassalaýjy desga we beýleki möhüm binalar gurlar.
Bu taslama döwlet Baştutanynyň sebitleri ösdürmek we ilatyň ýaşaýyş-durmuş derejesini ýokarlandyrmak boýunça alyp barýan durmuş ugurly ykdysady syýasatynda nobatdaky möhüm ädimdir.
