2026-njy ýylyň 6-njy aprelinde Pariž şäheriniň «Théâtre de l’Opprimé» teatrynda «Garaşsyz, baky Bitarap Türkmenistan – bedew batly at-myradyň mekany» ýylyna we Milli bahar baýramyna bagyşlanan medeni-sazly çäre geçirildi. Bu barada Türkmenistanyň Daşary işler ministrliginiň metbugat gullugy habar berýär.
«Destan» medeni birleşigi tarapyndan Türkmenistanyň Fransiýadaky Ilçihanasynyň goldawy bilen guralan bu agşama Parižiň ýaşaýjylary, sungat we medeniýet işgärleri gatnaşdy.
Iki bölümden ybarat bolan döredijilik agşamynda Maýa Kulyýewa adyndaky Türkmen milli konserwatoriýasynyň mugallymlaryndan ybarat wekiliýet türkmen halkynyň baý sazçylyk däplerini görkezdi. Birinji bölümde dutar, gyjak, gargy tüýdük we gopuz ýaly milli saz gurallarynda şirin owazly eserler ýerine ýetirildi. Ikinji bölüm bolsa milli saz gurallarynyň tanyşdyrylyşyna hem-de sazandalar bilen geçirilen döredijilikli söhbetdeşlige bagyşlandy.
Çäräniň ahyrynda guralan sergi arkaly myhmanlar türkmen halylarynyň, amaly-haşam sungatynyň we milli saz gurallarynyň ajaýyp nusgalary bilen tanşyp bildi. Bu çäre halklaryň arasyndaky medeni-ynsanperwer gatnaşyklary berkitmekde nobatdaky möhüm ädim boldy.
Türkmenistanyň medeniýet ussatlarynyň sazly çykyşlary dowam edýär.
