2026-njy ýylyň 12–17-nji maýy aralygynda Kazan şäherinde geçiriljek Kazan Halal Market halkara söwda ýarmarkasynda Türkmenistanyň önümleri görkeziler. Bu çäre «Russiýa — Yslam dünýäsi: KazanForum» XVII halkara ykdysady forumynyň çäklerinde guralyp, dünýäniň halal standartlaryna laýyk gelýän harytlary mahabatlandyrmak üçin esasy meýdançalaryň biri bolup hyzmat edýär.
Türkmenistanyň bu sergä gatnaşjakdygy barada Tatarystan Respublikasynyň Maýa goýumlary ösdürmek agentliginiň ýolbaşçysy Taliýa Minullina habar berdi.
Ýarmarkanyň çäklerinde türkmen kärhanalary tarapyndan azyk önümleri, kosmetika serişdeleri, dokma önümleri we öý hojalygy üçin zerur bolan dürli harytlar hödürlener. Sergä gatnaşmagyň esasy şerti önümleriň resmi halal-şahadatnamasynyň bolmagydyr.
Bu halkara çäre türkmen öndürijileri üçin eksport mümkinçiliklerini giňeltmäge, täze işewürlik gatnaşyklaryny ýola goýmaga we sebitara söwda-ykdysady gatnaşyklary mundan beýläk-de berkitmäge amatly şertleri döreder.
Geçen ýyl ýarmarka Türkmenistan bilen bir hatarda Russiýa, Owganystan, Pakistan, Gazagystan, Türkiýe we Eýran ýaly ýurtlardan 150-den gowrak kompaniýany jemläpdi.
